চাংমাইশাল

তেঁতেলী আৰু সৰিয়হৰে ইলিচ মাছ

ইলিচ মাছ বুলি ক’লেই  সাধাৰণতে সৰিয়হ-ইলিচ, ভাপা ইলিচ, ইলিচ মাছৰ পাতুৰি  আদি  ৰন্ধনশৈলীয়েই আমাৰ মনলৈ আহে। এইবাৰ আগ বঢ়াইছোঁ ইলিছ মাছৰ এক ব্যতিক্ৰমী ৰন্ধন—

উপকৰণ
ইলিচ মাছ	৬ টুকুৰা
সৰিয়হ	২ চাহ–চামুচ
তেঁতেলী	১/২ টেবুল–চামুচ
কেঁচা জলকীয়া	৪টা
নিমখ	স্বাদ অনুসৰি
চেনি	১ চাহ–চামুচ
গোটা সৰিয়হ	১/২ চাহ–চামুচ
মিঠাতেল	২ টেবুল–চামুচ

প্ৰণালী: প্ৰথমে মাছকেইডোখৰ নিমখ আৰু হালধি সানি কিছু সময় মেৰিনেট কৰি ৰাখক৷ সেইখিনি সময়তে তেঁতেলীখিনি কাঁচৰ বাটি‍ এটাত একাপ পানীৰ স’তে মিহলাই লওক৷ তাৰ পাছত সৰিয়হখিনি দুটা কেঁচা জলকীয়া আৰু অকণমান নিমখেৰে সৈতে
মিক্সিত পেষ্ট কৰি, এটা বাটিত পেষ্টখিনিৰ লগত
হালধি আৰু এগিলাচ পানী মিহলাই  ৰাখক৷ এতিয়া এটা ফ্ৰায়িং পেনত মিঠাতেল দি গেছত তুলি দি, তেল গৰম হ’লে গোটা সৰিয়হকেইটা ফুটাই মাছ কেইচকল দি  কিছু সময় ইলুটি–সিলুটি কৰি সৰিয়হমিহলি পানীখিনি
এখন চেকনীৰে চেকি দি দিয়ক৷ সেইখিনি
উতল অহাৰ লগে লগে তেঁতে‍লীপানীখিনিও চেকি তাতে দি দিয়ক৷ স্বাদ অনুসৰি নিমখ দিয়াৰ লগতে অকণমান চেনি দি জোলখন ঘন হৈ অহিলে দুটামান কেঁচা জলকীয়া ফালি দি নমাই পৰিৱেশন কৰক৷

গুটিকচুৰে
সৈতে মাছ

উপকৰণ
চেনিপুঠি মাছ	৫০০ গ্ৰাম
কচু	১টা (১৫০ গ্ৰাম)
মেথিগুটি	১ চাহ–চামুচ
পিঁয়াজ	সৰু চাই ১টা
কেঁচা জলকীয়া	২টা
গোলনেমুৰ ৰস	২ চাহ–চামুচ
ধনি‍য়াপাত	২ টেবুল–চামুচ
নিমখ	স্বাদানুসাৰে‍

প্ৰণালী: প্ৰথমে কচুটো গুচাই টুকুৰা-টুকুৰ কৰি সিজাই লৈ পিটিকি লওক৷ তাৰ পাছত ফ্ৰাইপেনত মাছকেইচকল আধা ভজা কৰি সেই তেলতে মেথিকেইটা ফুটাই, পিঁয়াজকেইচকল দিয়ক৷ পিঁয়াজ ভালদৰে ভজা হ’লে হালধি দি আগতে পিটিকি থোৱা কচুখিনি দি অকণমান লৰাই এগিলাচমান গৰম পানী দিয়ক৷  উতল অহাৰ লগে লগে মাছ দি,  মাছ সিজি জোলখন  ঘন হ’লে নেমুৰস দি, অকণমান চেনি আৰু কেঁচা জলকীয়াকেইটা ফালি দি শেষত ধনি‍য়াপাত দি নমাই পৰিৱেশন কৰক৷

এইমাহৰ চাংমাইশাল ‘তৃপ্তি’-ৰ সৌজন্যত