অলকা মহন্ত
এক
দাঁত এটাত পোক ধৰিছে
একত্ৰিছতাই নজনাকৈ বিষ বাঢ়িছে
এটা-দুটাকৈ পোকবোৰ কাষৰ দাঁতটোলৈ বগাইছে
বাকী ত্ৰিছটাই কথাটো আওকাণ কৰিছে
বিষটো ক্ৰমশঃ উজাই গৈ আছে ।
দাঁতবোৰত এতিয়া দখল কৰিছে এটা অজান বিষ
আৰু কেতবোৰ প্ৰব্ৰজনকাৰী পোক ।
দুই
মুখৰোচক খবৰবোৰ জিভাখনে পাগুলি থাকোঁতে
পোকবোৰেও শুনিবলৈ পায়
মূল্যবৃদ্ধি বেৰোজগাৰ
বেদখলকাৰী উচ্ছেদ আৰু হুমনিয়াহ কাঢ়ি
জোৰকৈ কুৰুকি দিয়ে আপোনাৰ দাঁত ।
তিনি
আপুনি কোষ্ঠকাঠিন্যত ভোগা কথাটো পোকবোৰে জানে
ডাক্তৰে আপোনাক খাদ্য ভালকৈ চোবাই খাবলৈ পৰামৰ্শ দি এনজাইম্ দিছে
আৰু দাঁতবোৰ এবাৰ পৰীক্ষা কৰাবলৈ কৈছে ।
চাৰি
উচ্ছেদ অভিযানৰ খবৰে কাকতৰ পৃষ্ঠা দখল কৰিছে
জিভাখনৰ জৰিয়তে পোকবোৰেও খবৰটো পাইছে
বিষ বাঢ়ি গৈছে
খৰখেদাকৈ আপুনি ডেণ্টিষ্টৰ কাষ চাপিছে
পোক লগা দাঁতবোৰ উভালি পেলোৱাই ভাল ।
পাঁচ
পোক নামৰ এই নিমাখিত প্ৰাণীটোক
আপুনি ভুলতো দোষ নিদিব
ইহঁত পৰজীৱী
ঠিক আপোনাৰ-মোৰ দৰে
খবৰ কাগজত মুখৰোচক কথাবোৰ
উচ্ছন্নক পুনৰ সংস্থাপন ।
…
ঠিকনা :
বামুণীমৈদাম, গুৱাহাটী-২১